2006. urtean omenaldia eskaini zitzaion Berako Eztegara pilotalekuan Iñaki Ugartemendiari, herriko erremontista ohiari. Hamabortz urte beranduago erremontea bueltatuko da Berako frontoira eta bi egunez partida ikusgarriak antolatu dituzte. Maiatzaren 21ean, ortziralean 19:00etan hasita, Nafarroako XVI. Erremonte txapelketako lehen partidak jokatuko dituzte hiru bikotek eta biharamunean bertze jaialdi bat antolatu du Erremonte Fundazioak.
Ortziraleko jaialdian, Nafarroako erremonte txapelketa abiatzeko, Zeberio II eta Ion, Xanti Uterga doneztebarra eta Otano eta Eloy Otxandorena doneztebarra eta Azpiroz ariko dira elkarren kontra, hogei tantora jokatuko diren partidetan. Eztegara pilotalekuaren neurriak kontuan hartuta, 47 metro luze, beharbada Zeberio II.a eta Ion beteranoak izanen dira faborito.
Biharamunean, larunbatean 18:00etan hasiko den jaialdiko bigarren partidan ortziraleko bi bikote onenak ariko dira berriz ere elkarren kontra. Jaialdia hasteko, Matxin III.a eta Barricart, aita beratarra duen Aimar Jabalera doneztebarraren eta Aimar Saldias oiztarraren kontra ariko dira.
Bi jaialdiak ADANO elkartearen alde antolatu dituzte eta 5 euro ordaindu beharko dira sarreran. Txapelketa osoan bezala, Covidaren kontrako protokoloa beteko da, musukoa erabiltzea derrigorrezkoa da eta gehienez ere 180 ikusle sartu ahal izanen dira. Hortaz, jaialdiak hasi baino ordu erdi lehenago frontoira hurbiltzea aholkatu dute.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!