Burujabetza berreskuratzeko beharra badela ikusita sortu dute Nafarroa Berriz Altxa herri ekimena, «eguneroko bizitzan eragiten digun guztiari buruz libreki erabaki nahi dugulako, inongo esku-hartzerik gabe». Ekainaren 19an manifestazioa ere deitu dute Iruñean, baina hori baino lehen, herriz herri aurkezpenak eginen dituzte.
Larunbatean, erraterako, Lesakan egina dute Bortzirietako hitzordua, 12:00etan Zabaleta dorretxean. Argazkia ere atera nahi dute eta Bortzirietako herritarrei parte hartzeko deia egin diete. Hitzorduaren harira, bertsoa ere egin dute:
Amaiurren, Noainen
a ze sarraskia
Dependentzia ateri
zaigu garestia
Independentzirako
badugu astia
Lehenbizi atera behar
dugu argazkia
Altxa gaitezen zahar
heldu ta gaztia
Eta bete dezagun
Zabaleta azpia.