Gaur arrantzatu dute Bidasoko 'Lehenbizikoa' eta 1.000 eurotan erosi dute Donostiako eta Iruñeko bi jatetxeren artean

Iruñean bizi den 28 urteko asturiar batek arrantzatu du Endarlatsan 2021eko Lehenbiziko izokina. Ismael García Fernandez da arrantzalea eta, arrantza sasoiko bigarren egunean, 15:30 aldera, atera du 7,8 kiloko pieza, 89 zentimetroko luzera eta 20 zentimetroko zabalera duen izokina. Aurten 1.000 eurotan erosi dute erdibana bi jatetxeren artean: Igeldoko (Gipuzkoa) Rekondo jatetxeko Txomin Rekondok eta Iruñeko Maisonnave hotelean dagoen Caravinagre jatetxeko Ulises Mejiak.

Gaurkoa, Nafarroako Gobernuak Oronoz-Mugairin duen arrain-haztegitik datorren izokin bat da. Halaxe baieztatu dute Ingurumen Departamentuko zaindariek identifikazioa egin ondotik. Iazko salbuespenaren ondotik, izokinaren arrantzak normaltasuna berreskuratu du aurten eta, ohikoa den bezala, denboraldia maiatzaren 1ean hasi da eta 51. izokina arrantzatzean itxiko da, edo, zenbaki horretara iristen ez bada, uztailaren 31n.

Ismael Garciak Lorenzo Jaurena Berako Ehiza eta Arrantza Elkarteko presidentearen eskutik hartu du 2021eko Lehenbizikoa arrantzatu duela egiaztatzen duen plaka.

Ismael García Fernández arrantzalea, 2021eko Lehenbiziko izokinarekin.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun