Bortzirietako Euskara Mankomunitateak abiarazi zuen gogoeta prozesuaren parte da jardunaldia. Hogeita hamar urteko ibilbidearen ondotik, eskualdeko euskalgintzaren antolamendua berrikusteko eta berrantolatzeko asmoa daukate. Prozesuak hiru saio izanen ditu guztira, eta lehenbizikoa Berako Beralandetan egin zuten martxoaren 26an. Bortzirietako euskara batzordeetako kideak elkartu ziren bertan, eta batzordearen ibilbidea agortutzat eman zuten, etorkizunean eskualdeko euskalgintza bertze modu batera antolatzeko.
Lesakako bilera honetan, bertze herri eta eskualdetako euskalgintzak eta herri mugimenduen antolakuntzak ezagutuko dituzte. Horretarako, Bortzirietako Euskara Mankomunitatearen sorrerari eta ibilbideari errepasoa eginen diote lehenik. Gero, Kike Amonarriz soziolinguistika eta Topaguneko lehendakariak “Euskara bidegurutzean” hitzaldia eskainiko du. Segidan, hiru testigantzen bitartez hainbat udalerritako elkarteen lanak ezagutuko dituzte. Azkenik, talde dinamika eginen dute Elhuyar Aholkularitzak gidatuta, aditutako esperientzietatik Bortzirietara zer ekar daitekeen lantzeko.
Hirugarren bilera maiatzaren 29an eginen dute, Bortzirietako euskaren aldeko mugimendu sozialaren antolamenduaz gogoeta egitea eta balizko egitura berria abian jartzeko talde eragilea sortzea izanen duena helburu.
Bi saio hauetan parte hartzeko izena eman behar da aitzinetik. Interesatuek formulario bat bete beharko dute, 948 634 125 telefono zenbakira deituz edo euskara@bortziriak.eus helbidera idatziz lortuko dutena. Elkartetik bortz herrietako partaideak bertaratzearen garrantzia azpimarratu dute, eta dei berezia egin diete gazteei.