Ageri denez, Berako Aspace zentroan dagoen gaztea ez zen arratsaldeko azken orduan itzuli, eta zentroko langileak haren bila hasi ziren. Aurkitu ez zutenez, Foruzaingoari deitu zioten, eta gaueko hamarrak eta erdietan hasi ziren bilatzen, zentroko langileekin batera. Gauez Berako suhiltzaile boluntarioak eta Oronozko eta Cordovillako suhiltzaileak ere aritu dira bilaketa lanetan, salbamendu-txakurren taldearekin.
Gaur goizean, Aspace zentroko zuzendariak gaztearekin telefonoz harremanetan jartzea lortu du. Galdetu diote ea eguzkiak ematen zion (airetik ikusteko agerian zegoen ala ez jakiteko) eta zer ikusten zuen, eta berak erantzun die joan den hilabetean suteak erretako lekuan zegoela. Helikopteroa inguru horretara joan da eta gazteari kamiseta kentzeko eta seinaleak egiteko eskatu diote. Azkenean, 10:45ak aldera aurkitu dute, onik.
