Historikoa izan daitekeen asteburu baten atarian dago Lesakako Beti Gazte sokatira taldea. Euskal Herriko txapelketako azken bi txapelak izanen dira jokoan Getxon (Bizkaia). Larunbat arratsaldean txapelketa mistoa jokatuko da, 580 kiloko kategorian eta igande goizean gizonezkoen 560 kilokoa, pisu arinekoa. Bertze bortz kategorietako txapelak irabaziak dituztela kontuan hartuz, historian lehen aldiz kategoria guztietako txapelak janzteko aukera dauka Lesakako taldeak. Gainera, aitzinetik, Nafarroako txapel guztiak irabaztetik dator.
Gizonezkoak Munduko txapeldun suertatu ziren garaietan ere ez zuten inoiz Euskal Herriko txapel guztiak irabazterik lortu. Bakarren batean, kategoria horretan Euskal Herriko txapeldun izan gabe ere lortu zuten Munduko txapeldun izatea.
Emakumezkoek joan den urtean lortu zuten lehen aldiz Euskal Herriko txapeldun izatea pisu astunean, baina hirugarren izan ziren arinean. Aurten biak irabazi dituzte.
Asteburuko jardunaldia
Larunbat arratsaldean, txapelketa mistoan, Beti Gaztekoekin batera, Txantrea, Berriozar, Antsoain eta Ibarrako neska-mutilak ariko dira. Igande goizean, gizonezkoen 560 kiloko txapela irabazteko lehian, Beti Gazte, Txantrea eta Antsoain bakarrik ariko dira.