Iñaki Atxaren 'Basabizitza' erakusketa ikusgai izanen da Beran

Ttipi-Ttapa 2021ko mar. 25a, 17:00
Iñaki Atxak azken hamar urteetan animalia basatiei han eta hemen ateratako argazkiak erakutsiko ditu Beran.

Labiaga ikastolako aretoko erakusketan 2011. urtetik hasita mundu zabalean animalia basatiei Elizondoko argazkilariak egindako argazkiak azalduko dituzte martxoaren 27tik maiatzaren 30era, asteburuetan

Martxoaren 27tik maiatzaren 30era Labiaga Ikastolako Areto Nagusian, Iñaki Atxa Aranburu elizondoarraren Basabizitza argazki erakusketa ikusgai izanen da. Bertaratzen direnek, 2011. urtetik hasita Euskal Herrian, Katalunian, Espainian, Polonian, Finlandian eta Ameriketako Estatu Batuetan animali basatiei Iñaki Atxak (Elizondo, 1981) ateratako argazkiez gozatzeko aukera izanen dute. 

Erakusketa «azken urteetako lanaren emaitza» da eta bi helburu nagusi ditu: alde batetik, «egindako lana plazaratzea» eta, bertze aldetik, jendeari ikusaraztea «zein polita eta beharrezkoa den natura bere horretan mantentzea eta, bere horretan mantentzen laguntzea».

Erakusketaren ordutegia

Erakusketaren ateak larunbatetan eta igandetan 16:00etatik 20:00etara ikusgai zabalik egonen dira, martxoaren 27an hasi eta maiatzaren 30era bitarte. Lehenbiziko egunean erakusketan egonen dela iragarri du Atxak. Gainera, argazkiez gain bideo bat proiektatzeko asmoa du elizondoarrak. Bideoan «gure eskualdeko oihanetako biztanleei grabatutako irudiak agertuko dira».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun