Bertako gaztaina barietateak errekuperatzeko helburuarekin, hiru urtez luzatuko den proiektua du esku artean Arantzako Udalak, eta tarte horretan hainbat formazio emanen dituztela jakinarazi du. Bertzeak bertze, gaztainak nola zaindu behar diren edota zahartutakoak nola berreskuratu azalduko dute baita gaztainarekin zein aukera dauden aztertu ere. Proiektu horren barne, joan den abenduan egin zuten lehenbiziko saioa, Efren Martin gaztainetan adituarekin, Mikel Diaz Nafarroako Gobernuko mendiko ingeniariarekin eta Joseba Ibargurengoitia Euskal Herriko Haizen Sareko kidearekin.
Heldu den larunbatean, martxoaren 27an, eginen da hurrengo saioa. Aurten hiru saio izanen direla adierazi dio Dabid Iturria Arantzako alkateak TTIPI-TTAPAri, «udaberrian, udazkenean eta neguan» eta horietan lehenbizikoa izanen da martxokoa. Zehazki, bertako gaztaina barietateak txertatzeko ikastaroa izanen da. Goizean, saio praktikoa eginen dute eta horretarako 08:30ean bilduko dira Herriko Plazan. Arratsaldean, berriz, alde teorikoa landuko dute, 16:00etan, eskolan.
Osasun egoera dela eta, edukiera mugatua izanen dela ohartarazi du Arantzako Udalak, eta hala, interesa dutenek aitzinetik izena eman beharko dute.