Martxoan Getxon (Bizkaia) jokatzen ari den Euskal Herriko sokatira txapelketaren barrenean, gizonezkoen 600 kiloko txapela jokoan izanen da martxoaren 20an, larunbatean 17:00etan hasita. Bertze kategoria guztietan bezala, Beti Gazte izanen da eskualdeko ordezkari bakarra. Lesakarrekin batera, Txantrea eta Berriozar nafarrak eta Ibarra gipuzkoarra izanen dira lehian.
Orain arte jokatu diren lau txapelak (gizonezkoak 680 eta 640 kilotan eta emakumezkoan 540 eta 500 kilotan) jantzi ditu Beti Gaztek eta helburu horrekin joanen dira larunbatean Getxora.
Martxoaren azken asteburuan azken txapelak
Larunbat honetakoaren ondotik, asteburu bakarra faltako zaio Euskal Herriko sokatira txapelketari. Martxoaren 27an txapelketa mistoa jokatuko dute 580 kiloko kategorian eta martxoaren 28an gizonezkoen 560 kiloko txapelketa.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!