Herria eta natura-ondarea babesteko, erantzukizunak eskatzeko, mugaz gaindiko mendi politika bateratuak bultzatzeko eta suhiltzaile zein babes zibileko langileen lana eskertzeko Berako, Lesakako, Biriatuko, Urruñako, Azkaineko eta Sarako udalek manifestazioa deitu dute martxoaren 13an 16:00etan Beran.
Manifestazioa segurtasunez egiteko 50 boluntario behar dira. Berako Udalak bidalitako oharrean adierazi duenez «lan erreza izanen da: trafikoa bideratu, manifestazioa nondik joanen den adierazi eta segurtasun neurrien berri eman», bertzeak bertze.
Laguntzeko prest daudenekin udalak bilera eginen du martxoaren 11n, ortzegunean, 18:30ean kultur etxean lanaren nondik norakoak azaltzeko. Laguntzeko prest dauden herritarrek izena emateko udalera deitu (948 63 00 05) edo bera@bera.eus helbidera idatzi behar dute.