Lesakako Roqués Organoaren Lagunak Elkarteak (AAORL), udalaren laguntzarekin, 2021erako aurreikusita dituen kontzertu sortako lehena antolatu du. Oraingoan, organoa+biolontxeloa da kontzertuaren formatua, eta martxoaren 14an, igandean eskainiko dute 17:30ean, San Martin elizan.
Ignacio Arakistain organo-jotzailea eta Oleg Sarapulov biolontxelo-jotzailea izanen dira kontzertua emanen dutenak. «Aurten antolatu dugun kontzertu-zikloak hainbat musika-tresna mota izanen ditu lagun, jendeak organorako konposatutako musikaren estilo eta errepertorio berriak ezagutu eta gozatzeko aukera izan dezan», adierazi du AAORL elkarteak.
13.410 euro dohaintzetan
Elkarteak sustatutako organoa zaharberritzeko proiektua gizarte-interesekotzat jo zen 2020an. Nafarroako Kultur mezenasgoari buruzko Foru Legearen arabera, onura fiskal handiak daude horrelako proiektuetan laguntzen duten enpresa eta partikularrentzat.
Kanpaina horretan 103 ekarpen lortu zituzten (102 partikular eta enpresa bat), eta guztira 13.410 euroko dohaintzak izan ziren eta elkarteak laguntza hori eskertu nahi du.
2021ean, berriz ere lortu dute gizarte-intereseko aitorpena, eta berriz ere animatu nahi dituzte partikularrak eta enpresak 2021eko abenduaren 31 baino lehen dohaintza egin dezaten MECNA-ren bidez, dagozkion zerga-abantailez baliatu ahal izan daitezen.