Berako Mendi Maratoi Erdia bigarren urtez bertan behera utzi dute

2022an elkar ikusteko hitzordua iragarri dute: 2022ko apirilaren 10a.

Aurten ere, 2021ean, Berako Mendi Maratoi Erdia ezin izanen dutela antolatu iragarri dute Manttale Mendi Lasterketa eta Agerra Mendi taldeek sare sozialetan. Izan ere, 2020ko edizioa ere bertan behera utzi behar izan zuten.

Antolatzaileen hitzetan aurten «ere ez da posible izanen Maratoi Erdia antolatzea». Pandemiak «ez du etenik ematen» eta egoera sanitarioaren bilakaera «ez da guztioi gustatuko litzaigukeen bezainbertze hobetu». Antolatzaileek adierazi dutenez «ez dakigu hemendik bi hilabete eta erdira egoera nolakoa izanen den, lasterketa egiteko intentzioa genuen datan». Baina, argi dute «Berako Mendi Maratoi Erdia beti antolatu dugun moduan ezin izanen litzatekeela ospatu». Izan ere, egun honetarako «550 korrikalari, 200 boluntario eta publiko aunitz» biltzen da. Egoera honen aitzinean, eta «atsekabez», lasterketa bertan behera uztea erabaki dute.

Bertzalde, oharra urte hauetan guztietan «lasterketa posible izatea egiten duten boluntarioei, korrikalariei, enpresei, saltokiei eta erakundeei eman diguten laguntza eta animoengatik» eskerrak eman nahi izan dizkiete.

Azkenik, 2022an elkar ikusteko hitzordua iragarri dute: 2022ko apirilaren 10a.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun