Mairu antzerki tailerrak 'Iluntzen' estreinatuko du urtarrilaren 30ean Lesakan

Ttipi-Ttapa 2021ko urt. 26a, 07:00
Deskargatu Info Ahotsak :
es en fr

Mikroipuinak, elkarrizketa biziak eta isiluneak tartekatzen ditu istorioak.

Gaizka Sarasolaren testuan oinarrituta eta Manex eta Ximun Fuchsen kanpo begiradapean, Iban Garro, Gaizka Sarasola, Juanen Saralegi eta Ritxi Abril aktoreak izanen dira oholtzan eta bertze lan-talde zabala gibelean laguntzen. Sarrerak 5 eurotan salgai daude Telletxea eta Xagu liburudendetan.

Mairu antzerki tailerrak Iluntzen lanaren estreinaldia eginen du urtarrilaren 30ean, larunbatean 18:00etan Lesakako Harriondoa Kultur Etxean.

Mikroipuinak, elkarrizketa biziak eta isiluneak tartekatuz, alegiazko istorio batean barneratu nahi du Mairu Antzerki Tailerreko lan honek. «Surrealismo magikoaren kutsua eman, baina errealitatearen iluntasunari ihes egin gabe. Idazkera poetikoan sakondu, eta gordintasuna azalerazi» tailerreko kideek diotenez.

Animaliak protagonista

Alegia klasikoetan bezala, antzezlan honetan ere animaliak dira protagonista; baita mito eta kondairetatik eratorritako pertsonaiak ere. Pertsonak diruditen animaliak edo animaliak diruditen pertsonak. Alegiazko pertsonaiak azken finean.

Kultura Bortziriak Lesaka

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun