Mairu antzerki tailerrak otsailaren 27an estreinatuko du azkenean ‘Iluntzen’ antzezlana

Otsaileko azken larunbatean 18:00etan Harriondoa Kultur Etxean

Mairu antzerki tailerrak ‘Iluntzen’ lanaren estreinaldia otsailaren 27an eginen du azkenean, otsaileko azken larunbatean 18:00etan Lesakako Harriondoa Kultur Etxean. Hasieran urtarrilaren 30erako iragarria zegoen estreinaldia baina gibelatu behar izan zuten, taldekideetako bat konfinaturik zegoelako. Sarrerak 5 eurotan salgai daude Xagu eta Telletxea liburudendetan. Urtarrileko emanaldirako erositako sarrerek balioko dute, baina nahi izanez gero salmenta puntuetan dirua itzuliko zaie erosi dutenei.

Gaizka Sarasolaren testuan oinarrituta eta Manex eta Ximun Fuchsen kanpo begiradapean, Iban Garro, Gaizka Sarasola, Juanen Saralegi eta Ritxi Abril aktoreak izanen dira oholtzan. 

Mikroipuinak, elkarrizketa biziak eta isiluneak tartekatuz, alegiazko istorio batean barneratu nahi du Mairu Antzerki Tailerreko lan honek. «Surrealismo magikoaren kutsua eman, baina errealitatearen iluntasunari ihes egin gabe. Idazkera poetikoan sakondu, eta gordintasuna azalerazi» tailerreko kideek diotenez.

Alegia klasikoetan bezala, antzezlan honetan ere animaliak dira protagonista; baita mito eta kondairetatik eratorritako pertsonaiak ere. Pertsonak diruditen animaliak edo animaliak diruditen pertsonak. Alegiazko pertsonaiak azken finean.

 

Sinopsia

Ibai baten ertzean dagoen herri batean bizi dira Erramun Joakin, Mari Pili eta Shepherd Jauna. Beraiekin dago Cristobal ere, ibaia gurutzatu nahi duen jendea laguntzeko prest dagoen erraldoia. Kezkaturik daude herria husten ari delako; jendez gutxitzen… Garai batean aberatsa izandako lekua, iluntzen ari da. Iluntasuna nagusitzen ari da. Ez da ontzirik gerturatzen aspaldian. Ez dute bisitaririk jasotzen. Eta Enara, argia ematen dien gaztea ere, kanpora joatekoa dela jakitean, etsipena eta kezka nagusitzen dira. Nola eragotzi herria itzaltzea? Nola biziraun?

Zaharkitzen dira herriak. Gazteek ihes egiten diote, halabeharrez, zerbait hobearen bila, edo ez dutelako bertan beraien lekurik aurkitzen. Garai batean aberatsa izandakoak, aberastasunak zabaldutakoa, kanpotik aberatsak ere erakarritakoak, isolaturik gelditzen ari dira; bizirauteko ia esperantzarik gabe. Bazterreko jendeari mugak itxi nahian ibiltzen gara, eta mugatuak bilakatu gara gu ere. Abiada bizian mugitzen den mundu honetan, bazterrean gelditzen dira lekuak; bazterrean gelditzen da jendea.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun