Lesakako Buruztanka Gaztetxea irekitzeko beharrezkoak diren obrak ordaindu ahal izateko sosa biltzeko helburuarekin binakako frontenis txapelketa antolatu zuten ilbeltzaren 2an. Denera 24 bikotek eman zuten izena, bikote bakoitzak seina euro ordainduta eta eskolako eta herriko frontoian aritu ziren.
Larunbat goizean, hiruna bikoteko zortzi multzotan banatu zituzten Bortzirietatik, Malerrekatik, Baztandik eta Bertizaranatik etorritako bikoteak. Txapelketa osoa egun bakarrean jokatzeko helburuarekin, partidak hogei minutura jokatu zituzten. Denbora tarte horretan tanto gehien zituen bikotea garaile. Larunbat arratsaldean, berriz, final laurdenak, finalerdiak eta finala, hau 22 tantora, jokatu zituzten. Finalean, Berako Ander Mitxelenak eta Zalain-Zokoko Mattin Garbisuk 22-13 irabazi zioten Malerrekako bikote bati.