Berriro ere gertatu da eta Berako Udala «etsipenez» mintzo da. Udaleko kideek Ttipi-Ttapari erran diotenez «ez dakigu nor edo nortzuk, ezta zein helbururekin, baina Aspacek eta udalak elkarlanean, herrian barrena paratu dituen landareak eta loreak 'lapurtzen' aritu da norbait». Oraingo honetan, badirudi, «gehien bat frontoi inguruko landareak eta loreak desagertu direla» eta etsipenez aditzera eman dute «ez dela lehenengo aldia».
Udalak «lapurreta, ekintza eta jarrera hauek onartu ezin direla» gaineratu du. Izan ere «udala ahalegin handia egiten ari da herria txukun eta polit mantentzeko. Herria denontzat atsegin bilakatu, batez ere, garai gogor hauetan». Baina, tamalez «dena zapuzten eta izorratzen dabilen jendaila dago, jo eta ke».
«Duela aste batzuk espazio publikoak zaborrez beteta agertzen zirela salatu genuen, baita igande goizetan zikinkeriaz beterik ernatzen den jolas parkearen berri eman ere». Baina, egoerak «berdin» jarraitzen duela kexatu dira udal kideak.
Zakur kakak ere arazoen iturburu dira «espaloiak, kaleak eta parkeak zakur kakez beteta agertzeaz nazkatuta gaude». Animaliekin jarraituz, «kale kantoietan katuak bazkatzen, janari hondarrak eta zikinkeria uzten dutenak ere badira. Eta hau, ez da animaliak zaintzeko modu egokiena».
Sasoiari erreferentzia eginez, honela mintzo da udala «zer pentsatuko dute Mari Domingik eta Olentzerok honetaz? Badute ikatza nori banatu!».