Ekimen hauek guztiek aparkalekuak ongi erabiltzeko helburua dute, guztion mesederako. Behin eta berriro erran bezala, Berako Herriko Etxetik gogoratu nahi dute «aparkatzeko arauak eta debekuak errespetatu behar direla Beran ere, bertze hirietan egiten den bezala». Hots, ezin dela aparkatu espaloietan, oinezkoen pasabideetan, mugikortasun urriko pertsonentzat gordetako aparkalekuetan beharrezko txartelik gabe, garraio publikorako lekuetan, zamalanetarako aparkalekuetan horiei gordetako orduetan, bigarren lerroan, badoetan eta, oro har, seinale bertikal edo horizontalaz (marra horiaz) debekatutako eremuetan. Eta, jakina, ezin da aparkatu Kanttonberri eta Toki Onako aparkaleku berdeetan txartelik gabe.
Debeku hauek guztion eskubideak errespetarazteko ezarriak direla gogorarazi dute Udaletik. «Herritar gehienok betetzen ditugu, eta zilegitasun osoa dugu betetzen ez dutenei haien jarrera aldatzeko eskaera egiteko», dio Berako udalaren bandoak. Udalak beharrezko neurri guztiak hartuko ditu (isunak, grua ...) gizalegegabeko jarrera horiek geldiarazteko.
Jarrera horiek gelditzeko eta zuzentzeko, abenduaren 14tik 18ra aparkalekuen erabilera egokia bultzatzeko kanpaina eginen da, eta arau-hausteak zigortuko dira, ordenantzan agertzen diren isunak ezarriz. Kanpaina horretan baliabide berriak erabiliko dira, kontrol prozesua errazteko, errate baterako, arauak betetzen ez dituzten autoen matrikulak jasoko dituen kamara duen autoa, horren bitartez, zuzenean, isunen tramitazio prozesua hasiko delarik.