Erika Lagoma II. Pello Errota bertsolari sariketa finalean izanen da azaroaren 1ean

Ttipi-Ttapa 2020ko urr. 22a, 09:00
Finalerako sarrerak salgai daude dagoeneko Asteasuko Patxine eta Iturri Ondo tabernetan, Zizurkilgo Iriarte jatetxean eta Villabonako Amasa kafetegian, 5 euroren truke.

Azaroaren 1ean, Asteasun eginen dute Asteasuko Udalak eta Harituz Bertsozale Taldeak antolatu duten II. Pello Errota bertsolari sariketaren finala. Amaia Iturriotz, Erika Lagoma, Iñigo Izagirre, Izarne Zelaia, Jon Martin eta Unai Mendizabal ariko dira nor baino nor txapelaren lehian. 

Abaltzisketa eta Irurako kanporaketetan bezala, Asteasuko finalean ere giro ederra izatea espero dute antolatzaileek. «Orain arteko saioetan, bertsolari zein bertsozaleek ezin hobeto elkar hartu dute eta giro beroa sortu da kanporaketetan» adierazi dute Harituzeko ordezkariek.

COVID19ak eragindako egoera dela eta, segurtasun neurri zorrotzak betetzen ari dira antolatzaileak txapelketetako saioetan, hala nola, bertsolari zein bertsozaleei tenperatura hartuz eta hidrogelarekin eskuak garbiaraziz. 

2018an jokatu zen lehenengoz Pello Errota bertsolari sariketa. Sariketaren helburu nagusia sariketetatik kanpo geratu diren eta plazaz-plazako zirkuituan sartzeko aukerarik izan ez duten maila oneko bertsolariei jendaurrean kantuan aritzeko aukera ematea da. Lehenengo edizioan, Eneko Lazkozek irabazi zuen txapela eta aurten erabakitzeko dago nork hartuko dion txapeldunaren lekukoa.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun