Horretarako, udalak Hiritik at kooperatiba lagun duela, mugikortasun plana osatzeko prozesua jarri du martxan, eta herrian nola mugitzen garen aztertu, ditugun gabezi eta beharrak detektatu eta hauek oinarri hartuta epe motz-ertaineko erronkak mahai gainean jarriko dira.
Edonola ere udala jakitun da, herritarren iritzirik jaso gabe hau burutzea ezinekoa dela, hori dela eta prozesu parte-hartzailea jarri du martxan. Eman beharreko aldaketak, herritar ororen errealitateak kontuan hartuz, modu horizontalean eta elkarlanean erabakiak izan daitezen.
Prozesu parte-hartzailearen baitan, irailaren 14ean hasi eta irailaren 25a bitarte, 16 urtez goitiko Lesakan erroldatutako herritarrek galdetegi bat betetzeko aukera izanen dute. Honen bidez, mugikortasun ohituren inguruko informazioa jasoko da, neurri zehatz batzuen inguruko iritzia eman ahal izanen dute eta, azkenik, proposamenak luzatzeko tartea edukiko dute. Galdetegia bete ahal izateko bi bide zabalduko dira. Alde batetik, Lesakako udalaren web orrian zintzilikatuko da, bertan online bete ahal izanen delarik. Bertzetik, herriko zenbait komertziotan, Xagun, Orekan, Ogi berrin eta Izarra okindegian, paper formatuan eskuratu ahal izanen da, eta ondotik udaleko administraritzan entregatu beharko da. Datu pertsonalen eta bertan idatzitakoaren konfidentzialtasun osoa mantenduko da eta pertsona bakoitzak behin bakarrik erantzun ahalko du.
Eragileekin bilerak
Honetaz gain, lehen aipatu bezala, helburua herritar ororen errealitateak kontutan hartuko dituen proposamena definitzea denez, herriko kolektibo/eragileekin bilerak egiten ari da talde teknikoa. Hala nola, ikastetxeak, guraso elkarteak, udal langileak, arkitektoak, aniztasun funtzionala duten pertsonak, ostalariak, merkatariak, adinekoen elkarteak, eta gisakoak izaten ari dira elkarrizketatuak.
Ikerketa faseak urte bukaera arte iraunen du, behin informazio guztia jasotzen denean, talde teknikoaren lana izanen da hau guztia prozesatzea eta proposamenari forma ematea. Prozesuari amaiera emateko, aurkezpen ekitaldi bat burutuko da.