Bertze urtetan bezala, bi posturik garestienak zortzigarrena eta hamaikagarrena, 3.380 eurotan atera dituzte. Hala ere, zortzigarrena esleitu gabe gelditu da eta hamaikagarrena atera den prezio berean esleitu dute. Hamabigarren postuak bakarrik hobetu dute hasierako prezioa, 1.710 eurotik 2.640ra altxatuz. 1, 2, 8, 15, 16, 17 eta 18. postuak hutsean gelditu ziren eta gainerako postu guztiak hasierako prezioan eman dituzte.
Emandako 14 postuengatik gutienez 27.870 euro hartuko ditu Etxalarko Udalak. Esleitzen zituzten 21 postuak udalak aurreikusitako prezioan saldu izan balitu, 35.390 euro bilduko lituzke. Gogoratu behar da 2000. urtean 50.000 euro lortu zituela Etxalarko Udalak eta 2004an 81.875 euro.
Irailaren 11n, heldu den ortzirale eguerdiko 12etan bukatzen da sesteorako aukera (prezioaren seiren bat igo beharko litzateke gutienez) eta hutsean gelditutako 7 postuak eta sesteoan mejora izan dutenekin, berriz eginen da enkantea irailaren 15ean, asteartea, arratsaldeko 7etan.