Ikusle kopurua mugatuta, musukoa soinean eta higiene neurriak hartuta egin dituzte ekitaldiak Arantzan. Larunbat arratsaldean bi pilota partidez gozatzeko aukera izan zuten pilotazaleek. Lehenbiziko lehian Arrizabalaga eta Aldai, Garai eta Mendizabalen aurka aritu ziren eta bigarrengoan, Ongai eta Arbizuk Alberdi eta Tabar izan zituzten kontrario. Ondotik emanaldi ederra egin zuten Bankako Menditarrek.
Igandeko hitzordua, berriz, herri kirol saioarekin hasi zen. Alvaro Zugarrando harri-altxatzailearen erakustaldiaz gain, bildutakoek Nafarroako 2. mailako aizkolari kanporaketarekin gozatzeko aukera izan zuten. Ondotik, Patxi Larretxea gai-jartzaile zela, Xabat Illarregi, Saioa Alkaiza, Alaia Martin eta Andoni Egaña bertsotan aritu ziren.