Larunbat honetan hasita hainbat kontzertu eskainiko ditu datozen asteetan Pettik

Ttipi-Ttapa 2020ko uzt. 8a, 19:00

Covid-19aren ondorioz, alde batera gelditu ziren aurreikusitako Pettiren kontzertu guztiak, tartean Manipulazio estrategiak bere azken lanaren aurkezpena, martxoaren 15ean Bilboko Guggenheim museoan aurkeztekoa zuena. Baina egoerak baimendu ahala, hasia da zuzenekoetara itzultzen. Uda honetan, hainbat hitzordu izanen ditu, tartean Lesakan eta Arantzan.

Larunbat honetan Aretxabaletako (Gipuzkoa) Otala Zelaian kontzertua emanen du Berako artistak bakarka, 19:00etan. Uztailaren 19an, berriz, Lesakako Plaza Zaharrean ariko da –eguraldi txarrarekin Kultur Etxean–, Etxeko Uztarekin, eta bere azken diskoa aurkeztuko du 19:30etik aitzinera.

Uztailaren 24an Oriorako (Gipuzkoa) bidea hartuko du, Arraun etxean, 20:00etan bakarka kontzertua egiteko. Bi egunetara, hilaren 26an, Donostian (Gipuzkoa) ariko da eta 30ean Jaurrietan (Nafarroa). Abuzturako, oraingoz, emanaldi bat hitzartuta du: abuztuaren 8an Arantzako Aterpean ariko da, 19:30etik aitzinera.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun