Covid-19aren deseskalada fasea leuntzeko, Nafarroako Gobernuak gomendatu bezala, Lesakako Udalak herriaren erdiko gunean oinezkoen espazioa zabaltzea erabaki du eta zenbait karrikatan trafikoari mugak jarriko zaizkio eta espaloiak zabalduko dira. Egokitze lanak ekainaren 4an, ortzegunean hasi dira, eta egin ahala karrikak trafikora ixten eta espaloiak zabaltzen joanen dira. Dagoeneko, Beheko Plazara, Herriko Etxe aldera eta Zarandia karrikara autoak sartzea mugatzeko piboteak jarri dituzte.
Honela, Beheko Plaza eta Zarandia karrikako gune batzuk bai trafikoari bai aparkaleku gisa itxiko dira eta bertako bizilagunen aparkaleku pribatuetara iristea bakarrik izanen da posible. Plaza Zaharra eta Arretxea karriketan trafikoa norabide bakarrekoa dela kontuan hartuz, espaloia zabalduko da eta ibilgailuen abidadura mugatu.
Aipatu neurriak malguak eta behin-behinekoak dira, printzipioz krisiak iraun bitartean mantenduko dituztenak, eta beharra ikusiz gero egokitu daitezke. «Badakigu gure eguneroko ohituretan aldaketak eraginen dituela, baina Udal honek segurtasuna bermatzea du lehentasuna, kasu honetan pertsonen arteko guttieneko distantzia mantentzen erraztea», dio Lesakako Udalaren neurriak.