Ibon TXOPERENA ELOSEGI Lesakako laguntza sareko kidea
Adinekoei erosketak etxera eramateko laguntza sareak eraiki dituzte eskualdeko hainbat herritan. Lesakan 31 lagun ari dira boluntario lan horiek egiten. Horien artean da Ibon Txoperena: «kuadrillako Whatsapp taldera laguntza sareko kide izateko deialdia ailegatu zitzaigun eta izena eman nuen». Erraza eta erabilgarria da eskaintzen duten aukera: «beharra duenak dendara deitu eta behar dituen produktuak eskatzen ditu. Dendariak, erosketa prest duenean, udal langileei abisua pasatzen die eta hortik guri deitzen digute».
Momentuz, herritar bat lagundu du: «etxean nengoen eta deia jaso nuen. Nora joan beharra nuen erran zidaten eta kasu honetan herritik kanpo zegoenez autoz joan nintzen. Dendariak hartu beharrekoa zer zen erran zidan eta etxera eraman nion. Tinbrea jo eta non utzi esan zidan». Bitartean, «solas pixka bat egin genuen».
Egoera honetan laguntza behar dutenei «aukera badutela eta hori aprobetxatzeko» deia egin die Txoperenak: «jende aunitzek inguruan badu laguntzeko norbait baina hala ez bada prest dagoen jendea badagoela baliatu».
