Ekhine Zapiain Arlegi beratarrak, bertsolari gazteentzako antolaturiko Abra Sariketa irabazi du. Joan den ortziralean, Algortan burutu zen Albe Algortako bertso eskolak antolatzen duen bat-bateko sariketako finala. Euskal Herri osoko sei bertsolari aritu ziren kantuan; Ekhine Zapiain beratarrarekin batera, Aritz Landeta getxoztarra, Maddalen Ruesgas berangoarra, Martin Abarrategi aramaioarra, Lierni Rekondo lasartearra eta Irati Alkantarilla urruñarra.
Lehen fasea akitu ondotik, Ekhinek buruz buruko saioa jokatu zuen Irati Alkantarillarekin, gaur egungo Euskal Herriko eskolarteko txapeldunarekin. Nafarroako eskolarteko azken bi txapelketetan txapeldunorde izan ondotik, bat-bateko lehen txapela jantzi du 17 urteko beratarrak.