Duela zazpi urte antolatu zuen Beti Gazte Elkarteak lehenengoz Arbolaren Eguna:«Inguruko herrietan antolatzen zela ikusi genuen eta hemen halakorik ez zela egiten ikusita, antolatzea pentsatu genuen». Beti Gazte Elkarteko Modesto Maiak Xorroxin irratiari adierazi dionez, harrera bikaina izan zuen lehenbiziko urtean: «sekulako jendetza bildu zen, baina azkeneko urtetan gutxiago izan dira». Horregatik, parte hartzeko gonbidapena luzatu die herritar guztiei:«nahi genuke haurrak, gazteak, helduak, adinekoak... animatzea. Etortzen diren guztiak ongi etorriak izanen dira». Baldintza bakarra, «norberak bere aitzurra eta lana egiteko gogoa eramatea da. Indarrak berreskuratzeko gosaria gure kontu». Auzolanean, natura zaindu eta elkarrekin ongi pasatzeko aitzakia dela ere gaineratu du «mendia berreskuratzeko modua da».
Otsailaren 15ean eremua prestatu ondotik, otsailaren 22an eginen dute landaketa. Gardelko pagoetan, 150 bat arbol landatuko dituzte, «hosto zabalak landatuko ditugu. Bertako haritzak, lizarrak, gereziondoak, pagoak eta gaztainondoak eta aitzineko urtetatik igortuak daudenak ere berriz landatuko ditugu».