Larunbatean, Erron, Arranopola taldeak Pirini bardo taldea menderatu zuen. Eneko Fernandez, Josu Sanjurjo eta Erika Lagoma lesakarrek eta Etxahun Azkarraga etxalartarrek hartu zuten parte Arranopola taldean. Beraz, bortziritarrek lehen puntua lortu dute. Hurrengo saioa otsailaren 14ean izanen dute, Lesakako Arrano elkartean.
Igandean, berriz, Beran Lamixene eta Amortziaren Eliobak taldeen arteko saioa jokatu zen Kataku ostatuko terrazan. 60 bat entzuleren aintzinean kantatu zuten, otsaileko ezohiko arratsalde epel batean. Amortziaren Eliobak taldean, Maddi Ane Txoperena eta Josu Txoperena, Lesakarrek eta Aimar Karrika auriztarrak kantatu zuten. Berako Lamixene taldean, berriz, Patxi Castillo, Ekhine Zapiain, Aitor Elexpuru eta Julen Zelaieta aritu ziren kantari. Gai-jartzaile eta aurkezle lanak Ainhoa Larretxea, Lamixene taldeko partaideak burutu zituen. Epaile gisa berriz, Arranopola taldeko bi kide eta publikoko 5 kide aritu ziren. Epaileek eta publikoak hala erabakita, Lamixene taldearentzat izan zen garaipena. Beratarrek larunbata honetan Iruñean jokatuko dute bigarren saioa, bertako Drimtim taldearen kontra.
Ortziralean Elgorriagan
Aitzinera begira, eta Bardoen barne, ortzirale honetan bertso saioa izanen da Elgorriagan. Bertan Bertsonautak taldeko Alazne Untxalo eta Iker eta Egoitz Gorosterrazu, Larraungo taldearen aurka ariko dira. 19:00etan hasiko da saioa Elgorriagako ostatuan. Guztira, 13 talde eta 96 parte hartzaile ariko dira Bardoetan, Nafarroako taldekako bertsolari txapelketan. Finala martxoaren 28an jokatuko da, Lizarran.
