Beti Gazte sokatira taldeko neskak izanen dira gaurko gonbidatuak ETB-1eko 'Gure Kasa' saioan

Ttipi-Ttapa 2020ko urtarrilaren 15a

ETB1eko 'Gure kasa' saioan izanen dira gaur gauean Beti Gazteko sokatira taldeko neskak. Argazkia: EITB

Euskal Herriko txapelketa irabazi dute launakako modalitatean eta etorkizunera begira dituzten proiektuez arituko dira

Gaur gauean, 13 gonbidatu izanen dituzte Antton eta Julen Telleria anaiek gidatutako ETB-1eko 'Gure Kasa' saioan:Beti Gazte sokatira taldeko neskak, hain zuzen ere. Euskal Herriko txapelketa irabazi dute launakako modalitatean, eta, orain, Irlandan jokatuko den munduko txapelketan pentsatzen ari dira. Beti Gazte taldearen ibilbide luze eta oparoa errepasatuko dute saioan, eta etorkizunera begira dituzten proiektuez hitz egiteko tartea ere hartuko dute.

Neskekin, platoan, Jon Garate, Marta Elvira eta Ainhoa Sanchez egongo dira. Jon Garatek, beste behin, Goenkalek esana atalean, Euskal Telebistako telesail mitikoaren bitxikeriak kontatuko ditu. Marta Elvira, berriz, potilleatzera joan da Lesakara, eta Beti Gazte sokatira taldekoen sekretuak ezagutzeko aukera izan du. Azkenik, Ainhoa Sanchez Barakaldora joan da, eta emakume futbolarien kromoak egiten dituen Iker Iglesiasekin hitz egiteko aukera izan du.

'Gure Kasa' astelehenetik ostegunera izaten da ikusgai, 21:00etan, ETB1en eta eitb.eus-en.

Kirola Bortziriak Lesaka

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun