Orain arteko ohiturari eutsiz, hilabeteko bigarren larunbatetan Baztan-Bidasoaldeko ekoizleen merkatua egiten segituko dute Beran. Baina larunbat honetakoa lekuz aldatuta eginen dute. Beralandetan 10:30etik 13:30era bilduko dira eta abendutik aitzinera ere, hilabeteko bigarren larunbatetan, Beralandetan elkartuko dira. Ohi bezala, hainbat produktu eskaintzen dituzten eskualdeko ekoizleak egonen dira: gasna, eztia, ukenduak, arrautzak, ogia, haragia... saltzen.
Berako Udaletik jakinarazi dutenez, «aukera ezin hobea da ekoizleekin harreman zuzena izateko». Hortaz, herritarrei eta ingurukoei merkatura hurbiltzeko deia egin diete «gure eskualdeko ekoizleak ezagutzeko eta bertako produktuekin elikatzeko». Horrekin batera, «eskualdeko ekoizleak merkatuan parte hartzera eta gainontzeko ekoizleekin ere espazioa konpartitzera animatu» nahi izan dituzte. Horretarako, «konpromisorik gabe», Udalarekin harremanetan jar daitezkeela adierazi dute.