105 ipuin aurkeztu dituzte Lesakako Beti Gazte elkartearen lehiaketara

Ipuin lehiaketako saridun batzuk, Peio Añorga ipuin-kontalaria, Ladis Satrustegi alkatea eta Beti Gazteko, Irain eskolako eta Tantirumairu ikastolako ordezkariekin.

Abenduaren 19an egin dute bosgarren edizioko sari banaketa, Peio Añorga ipuin kontalariaren saioaren ondotik

Bosgarren aldiz ipuin lehiaketa antolatu du Beti Gazte elkarteak, Lesakako Lehen Hezkuntzako 3, 4, 5 eta 6. mailako ikasleei zuzendua. Bortz edizioetako parte-hartze handiena izan da aurten eta 105 idazlan bildu dituzte eta horregatik, «bai Irain Eskola publikoko baita Tantirumairu ikastolako irakaslegoari lehiaketan izan duten konpromisoa» eskertu die Beti Gazteko Patxi Saenzek eta saria eman diete bi ikastetxeei. Edurne Aranburuk eta Rakel Olazabalak hartu dituzte oroigarriak, eskolaren eta ikastolaren izenean.

Ekitaldia hasteko, Peio Añorga ipuin-kontalariak zenbait istorio kontatu ditu eta musika lagun, dantzan ere paratu ditu Lesakako idazle ttikiak.

Sariei dagokienez, 3. eta 4. mailako ikasleak biltzen zituen A mailan, lehenbiziko saria Enaitz Bereau Irigoienek eskuratu du “Admes eta Adonis buzeatzen” idazlanarekin, bigarrena Ekaitz Irazoki Mendizabalek “Hostozko behia” ipuinarekin eta hirugarrena Aroa Arozena Tapiak, “Animaliak desagertu dira” ipuinarekin.

B mailan, (5. eta 6. mailak) lehen saria Mikel Urdangarin Tabernak  eskuratu du, “Azal zuriko beltzarana” ipuinarekin; bigarren saria Olarixu Urra Yecorak eskuratu du “Familiaz familia” idazlanarekin eta hirugarrena June Salgado Solok, “Ametsak egi bihurtzen dira” idazlanarekin.

Neska-mutikoek liburu batzuk jaso dituzte sari bezala. Horretaz gainera, bertze liburu batzuk ere zozketatu dituzte abenduaren 19ko sari banaketan izan ziren partehartzaileen artean. Ladis Satrustegi alkatea izan da sariak banatzen.

Kultura Bortziriak Lesaka
Erlazionatuak
Peio Añorga ipuin kontatzen Lesakan

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun