Lesakako Udalak klimaren eta energiaren aldeko konpromisoa hartu du

Energia aurreztuko duten inbertsioak bukatzatzeko hobari fiskalak onartu ditu Lesakako Udalak.

Ahobatez hartu zuen erabakia urriaren 31ko osoko bilkuran

 

Lesakako Udalak urriaren 31n egindako osoko bilkuran aho batez erabaki du Klimaren eta Energiaren gaineko Alkatetzen Hitzarmena izenpetzea. Europako ekimena da eta horren bidez tokiko gobernuek ere ardura hartzen dute berotegi-efektuko gasen isurien murrizketan eta denek ikuspegi bera hartzen dute aldaketa klimatikoa eta pobrezia energetikoa arintzeko eta haietara egokitzeko.

Hartutako konpromisoa honetan datza: lehenik, CO2-ko (eta, ahal dela, berotegi-efektuko gasen beste isuri batzuetako) isuriak gutxienez % 40 murriztea, hemendik 2030 bitartean, bereziki efizientzia energetikoa hobetuz eta energia berriztagarriak gehiago erabiliz. Bigarrenik, erresilientzia handitzea, klima-aldaketaren ondorioei egokituz.

Lan planean sartuta dago erreferentziako isurien inbentarioa eta klima-aldaketaren ondoriozko arriskuen eta kalteberatasunaren ebaluazioa egitea. Halaber, Klimarako eta Energia Jasangarrirako Ekintza plana prestatzea, Udalak erabakia hartu eta bi urteko epean. Azkenik,egoera-txosten bat aurkeztea, bi urtean behin gutxienez, klimarako eta energia jasangarrirako ekintza plana aurkeztu ondoren, hura ebaluatu, jarraitu eta kontrolatzeko.

Metodologia hau garatzeko, Lesakako Udalak Nafarroako Gobernuaren laguntza izanen du, LIFE NADAPTA proiektuaren esparruan: metodologia eta babes teknikoa, udaletako arduradunen lantalde batean parte hartu eta Lursarea-Nafarroako Lurraldearen eta Jasangarritasunaren Agentziak eta NELS Sareak emandako laguntza, klima eta energiarako ekimenetan jardunbide egokiak, ezagutza eta baliabideak partekatzeko.

Lesakako Udalak herritarrak gonbidatzen ditu erronka honetan elkarlanean aritu eta haren helburuak lortzen parte hartzera. Horretan laguntzeko, Lesakako Udalak hobari fiskalak onartu ditu energia aurreztuko duten inbertsioak bultzatzeko.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun