Euriari aurre eginez 15 margolarik kolorez bete zituzten igandean Berako karrikak

Ttipi-Ttapa 2019ko urr. 22a, 08:30

Bergarako Juanjo Altunak irabazi zuen Gure Txokoaren XV.margo lehiaketa aire zabalean eta Plentziako Letizia Gaspar bigarren izan zen

Berako Gure Txokoa elkarteak, Udalaren babesarekin antolatutako XV. margo lehiaketa aire zabalean egin zen urriaren 20an. Igandeko eguraldi euritsuari aurre eginez, Euskal Herria osotik etorritako 15 margolari bildu ziren, horietatik zazpi lehen aldiz Berako lehiaketan parte hartu zutenak.

Epaimahaikideak Juan Carlos Olaetxea Berako margolaria, Pedro Lozano Iruñeko margolaria eta gaur egun Nafarroako hiriburuan bizi den Nicolas Alba Rico eskultore-margolaria izan ziren.

1.000 euroko lehenbiziko saria Bergarako (Gipuzkoa) Juanjo Altunak eskuratu zuen Estitxu Pinatxo udal zinegotziaren eskutik. Bidasoa karrikako irudia margotu zuen irabazleak, San Esteban eliza ere ageri dela. 700 euroko bigarren saria Plentziako (Bizkaia) Letizia Gasparrek jaso zuen Jaione Dozagarat, Gure Txokoa elkarteko presidentearen eskutik. Hionek, Porttu etxearen gibeleko aldea margotu zuen. Lupe Mendigutxia, Gure Txokoako kultura ataleko bokala ere izan zen sari-banaketan. Bi herritar interesatu ziren sarituak izan ez ziren bi artelanetan eta egileekin solastuta, biak erosi zituzten. Ez da lehenbiziko aldia horrelako zerbait gertatzen dena.

Iamotenean egindako bazkarian margolariak eta beraien bikoteak izan ziren, epaimahaide eta antolatzailekin batera, giro bikainean.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun