Kasu honetan sareetan galtzen den ur kopuruan izandako aldaketa nabarmen baten berri eman nahi izan dute. 2014. urtean, Kaxerna edo Suspelttikiko depositoan datuak automatikoki jasotzen hasi zen Berako udala eta egun osoan ateratzen zen ur kopurua 1.600 metro kubiko ingurukoa izan ohi zen. Goizeko 6etarako, berriz, (gaueko kontsumoa, gehien bat ur isuriak) 300 metro kubiko inguru atera ohi ziren.
Azken urte hauetan sareak berritu, presioa jaisteko balbulak jarri, deposito guztiak monitorizatu ordenagailutik kontrolatzeko, ur galerak harrapatu eta moldatu eta bertze hainbat lan egin dira. «Honen ondorioz inoiz izan ditugun ur kontsumo daturik onenak ditugu momentu hauetan», diote Udaletik.
Egun osoan 850 metro kubiko inguru ateratzen dira depositotik, goizeko 6etan berriz 100 metro kubiko inguru. «Datu hauei esker eta udan zehar egin duen euriari esker, aurtengoan ez dugu kanpotik urik erosi beharrik izanen», azpimarratu du Udalak. «Bide onean goazela garbi dago baina oraindik bada zer hobetu herriko ur sareetan eta horretan segituko dugu».