Inguruko ikastolek topo egin dute Fraingo Oinez Basoan

Frain inguruan bildu ziren ikastoletako ikasle, irakasle eta gurasoak.

Ehun lagun baino gehiago elkartu ziren igandean

Igande goizeko euriari aurre eginez, ehun lagun baino gehiago bildu ziren igande goizean Frain mendian, Lesakako Tantirumairu ikastolaren deialdiarekin bat eginez. 2017ko Nafarroa Oinezen ondorioz Frain inguruan landatutako Oinez Basoa ikusteko antolatua zuten txangoa eta Lesakako ikastolako ikasle, irakasle eta gurasoekin batera, Berako Labiagakoak, Baztangoak, Sarako Olhaingoak eta Baigorrikoak bildu ziren, batzuk herritik oinez joanak eta bertze batzuk Piedaderaino autoz hurbildu eta gero joanak.

Goibelak eta behelainoa uxatu eta eguraldi eguzkitsu polita gelditu zen azkenean Frainen. Tantirumairu ikastolako ikasleek ekitaldirako egindako kantua abestu zuten, Oinez Basoa landatu den eremuan, bertako landarediaz eta faunaz informatzeko paratutako informazio-panelak ikusi eta hamaiketako ederra izan zuten.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun