Azken hogeita bat urteotan Arantza eta Igantziko udal batasuneko idazkari eta kontu-hartzailea izan den Mari Jose Larraioz urroztarrak Lesakako idazkari lanposturako frogak gainditu ditu eta Arantza eta Igantziko idazkari izateari utzi dio. Hala, bi herriek lanpostu hori betetzeko deialdia egin dute.
Aldi baterako kontratua eskaini dute eta aurkezteko Zuzenbideko gradua, Zientzia Politikoak eta Administrazioa gradua edo Zientzia Politikoetan lizentziatua izatea ezinbertzekoa izanen da. Horrez gain, euskararen ezagutza ere nahitaezkoa izanen da eta horretarako Hizkuntza-Eskolaren titulazioa aurkeztu beharko da (C1, EGA...). Ez dutenek euskara proba gainditu beharko dute. Gainerakoan, bertze proba teoriko bat egin beharko dute guztiek.
Eskaerak uztailaren 8ko 13:00etan aurkeztu beharko dira Arantzako Herriko Etxean. Behin epe hori pasatuta, hiru egun balioduneko epean onartutako behin-behineko hautagaien zerrenda argitaratuko dute Arantzako Udalaren webgunean (arantza.eus).
Aipatu, proba teorikoa gainditu eta lanpostua lortzen ez dutenen artean lan-poltsa osatuko dutela.