Artearekin lotutako bertze hainbat egitasmotan murgilduta dabil Pikabea. Ekainean, artea ikastetxetara hurbiltzeko asmoarekin, Iruñeko Izaga ikastetxean bere margolanak erakutsi ditu, Pedro Lanz lesakarraren eta Beintza-Labaienen bizi den Lesagibelen eskulturekin batera. Ikastetxean tailerrak eta bisita gidatuak ere egin ditu eta datorren ikasturtean egitasmo hau zabaltzeko asmoa du bertze ikastetxeetara ere.
Abuztuan erakusketa bere etxean eta azaroan Lesakako inauteriei buruz Baionako Euskal Museoan
Aitzinera begira, abuztuan bere etxean, Otsango auzoko Irisarrin, egin ohi duen erakusketa zabaltzeko asmoa du aurten ere Pikabeak. Gainera, azaroan, Baionako Euskal Museotik bertan egin nahi duten Lesakako inauteriei buruzko erakusketa kudeatzeko mandatua ere hartu du. Bere margolanez gain, argazki-lanak eta bertzelako erakustaldiak egin nahi lituzke. Azken bi urteetan Iparraldeko inauteriei buruzko erakusketak egin dituzte Baionan eta aurten Lesakakoak eman nahi dituzte ezagutzera.