Azken urteotan mendian eskarmentua hartu duen Ibai Iturria Garmendia mendizale beratarraren lehenbiziko egitasmo soziala izanen da. Ortzirale honetan, ekainak 7, Hondarribitik abiatuta, hilaren 23ra bitarte Pirinioak zeharkatzen dituen GR-11 ibilbideko 17 etapa egin nahi ditu. 17 egun iraunen duen desafioa izanen da eta bidean ahalik eta kilometro gehien eginez Andorrara ailegatu nahi du. Guttienez, 570 kilometro egitea da bere asmoa.
Proiektuaren helburua, ordea, Lyme gaixotasuna duten gaixoen eta haien senideak biltzen dituen Alyme elkarteari laguntzea izanen da. Hala, etapetan egiten dituen kilometro guztiak diruz ordaintzen ahalko dira. Norberak kilometroko nahi duen adinako ekarpena egiten ahalko du eta bildutako diru guztia elkartearentzako izanen da bere osotasunean.
Ekimenaren bitartez, Lyme gaixotasuna dutenei eta beraien familiei babesa eman nahi die Iturriak, eta aldi berean, eritasuna ezagutarazi eta ikerkuntzan laguntzeko dirua bildu nahi du. Adierazi duenez, egitasmoaren helburu nagusia prebentzioa izanen da, «Lyme gaixotasuna zergatik sortzen den eta mendian ibiltzean nola babestu helaraztea». Hori lortzeko elkartearen kontu zenbakia jakinarazi dute: ES09 0138 0010 40 0020719877.