Gizasemeetan, lehen jardunaldian bezala, tiraldi guztiak irabazi zituen larunbatean Beti Gazte taldeak Antsoainen (7 puntu). Ondotik sailkatu ziren Berriozar B (6 puntu), Txantrea (4,5 puntu), Berriozar A (4,5 puntu), Kaskallueta (3 puntu), Antsoain (2 puntu) eta Araxes (puntu 1). Bi jardunaldietako batura egin ondotik, Beti Gazte eta Txantrea sailkatu ziren finalerako eta hemen lesakarrak nagusitu ziren. Karmelo Mitxelena, Unai Gurrutxaga, Iñigo Altzugarai eta Gerardo Telletxea aritu ziren talde txapeldunean, Julen Palenzuela erakusle zutela.
Emakumezkoetan bi talde jarri ditu goma gainean Beti Gaztek 235 kikoko kategorian eta, Doneztebeko lehen jardunaldian bezala, bi onenak izan ziren Antsoainen ere. Beti Gazte Ak tiraldi guztiak irabazi zituen (6 puntu) eta Beti Gazte Bk denak Akoaren kontrakoak izan ezik (5 puntu). Berriozar hirugarren izan zen (4 puntu), Txantrea laugarren (3 puntu), Antsoain A bosgarren (2 puntu) eta Antsoain B seigarren (puntu 1). Finalean, ordea, Beti Gazte B nagusitu zitzaion Beti Gazte Ari.
Talde txapeldunean Irantzu Goienetxe, Karmele Pikabea, Udane Loidi eta Ainhoa Ubiria aritu ziren tiran, Joxe Angel Mitxelena erakusle zutela. Txapeldun orde izan zen taldean, berriz, Kristine Txoperena, Maddalen Lopez, Arritxu Muxika eta Maria Iantzi aritu ziren, Ane Gurrutxaga erakusle zutela.
Txapelketa mistoa larunbatean Berriozarren
Nafarroako 4x4 txapelketa bukatzeko maiatzaren 25ean Berriozarren jokatuko dute txapelketa mistoa jardunaldi bakarrean. Beti Gazteko bi talde eta Txantrea, Berriozar eta Antsoaingo taldeak lehiatuko dira.