Azken lehiaketa horren harira, maiatzaren 9an Iruñeko Civivox Iturrama aretoan 2019ko Gozamenez film labur lehiaketaren sari-banaketa izan zen, bertan izan ziren Pentsatzen hasiko bagina lana aurkeztu duten zortzi neska beratarrek. Saririk jaso ez bazuten ere, esperientzia interesgarria izan da hezitzailearen ikuspegitik: sexualitatearen gaia aitzakiatzat hartuz hainbat asteetan lagun artean beraien aisialdian zenbait hausnarketa, ideia, grabazio… elkarbanatu baitira. Lana ikusgarri dago http://www.gozamenez.com/eu/laburmetrai-lehiaketa/sexmdn-pentsatzen-hasiko-bagina atarian.
Ekainean harreman sexualak hizpide
Heziketa afektibo-sexualari dagokionez, aurreikusita dagoen hurrengo ekintza ekainaren 24an izango da, Beralandetan, 11:30etan, Hiesaren Aurkako Batzorde Hiritarreko sexologoaren eskutik. Tailerra 15 urtetik gorako gazteentzat izango da, GIB-aren (hiesaren) eta sexu transmisio bidezko infekzioei buruzko oinarrizko informazioa jasotzeko, harreman sexualen inguruko jarreraz hausnartzeko eta segurtasun praktiketaz mintzatzeko. Izen ematea 634 22 36 59 Whatsappean egin beharko da.