Lehenik abesbatzak Agurra (Herrikoia), Alma, corazón y vida (Adrián Flores Alván) eta Isidoro Fagoaga (Mari Jose Vergara eta Julen Zelaieta) abestuko dute; ondotik, txistulariek Pello Joxepe, Gerardo Butrónen rapsodia joko dute. Segidan, abesbatzak eta txistulariek elkarrekin Euskal musikaren gorespena (herrikoia), Mendigoizaleak (Alejandro Olazarán), Gabiltzan kalez kale eta Bigarren kalez kale (Pablo Solozabal), Gurea da (Sabin Salaberri) eta Negra Sombra (Rosalía de Castro) eskainiko dituzte; txistulariek bakarka, Kaskagorria (J.I Ansorena) eta Arin Arin (herrikoia) jo ondotik, bi taldeek elkarrekin borobilduko dute emanaldia, Pierre Bordazarre Etxaun-Irudiren Agur Zuberoa eskainiz.
Lehendik ere elkarrekin emanaldiak eskainiak dituzte Berako Abesbatzak eta txistulariek Donostian eta Zugarramurdin. Mendillorriko emanaldiaren ondotik, ekainaren 16an Aralarko santutegian kantatuko dute berriz, abesbatzak kantatuko duen meza ondotik. Berako abesbatzak maiatzaren 26an eta ekainaren 2an eta 23an kantatuko du Berako elizan, lehen jaunartzeak, sendotzeak eta Bestaberri egunak direla-eta. Heldu den urteko udaberrirako, Berako musika bandarekin eta herriko dantzariekin batera eginen duen emanaldi bat prestatzen ere ari da Berako abesbatza.