Altxata kultur eta kirol elkarteko kideen eskutik, heldu den larunbatean, maiatzaren 4an, IV. Mendi Itzulia eginen dute Etxalarren. Mendizaleak 07:00etatik 08:00etara abiatuko dira, herriko plazatik. Parte-hartzaileek irteerako kontrol-postuan jasoko dute txartela, eta hori hurrengo kontrol postuetan erakutsi beharko dute.
Bi ibilbide aukeran
Parte-hartzaileek bi itzuli, luzea eta laburra, izanen dituzte aukeran. Ibilbide luzea aukeratzen dutenek 34 kilometroko distantzia eta 1.650 metroko desnibela duen ibilbidea eginen dute; laburra hautatzen dutenek, berriz, 23 kilometro eta 1.290 metroko desnibela duena.
Izen-ematea zabalik dago www.mendizmendi.com atarian edo 06:00etatik 08:00etara herriko plazan. Federatuek 10 euro eta federatu gabeek 12 ordaindu beharko dituzte.