Berako Udalak dioenez, «Mendialdean bizi garenok badakigu gure herriak leku zoragarriak direla bertan bizitzeko. Naturak eskaintzen dizkigun paisaiak eta nekazaritza eta abeltzaintzak zaindutakoak ederrak dira, eta bizimodua lasaia da bertan. Baina, paisaia horren barruan, gure baserriak mendietan modu sakabanatuan egoteak baditu eragozpenak ere, larrialdi egoeretan erraterako. Larrialdi zerbitzuak, noizbait aurkitu izan dira baserriren bat aurkitu ezinda, zoritxarrez, horren ondorioz kalte material eta pertsonalak areagotu daitezkeelarik».
Zonaldeko Udalak, Nafarroako Gobernua (Suhiltzaileak, Osasun Saila, Foruzaingoa, Babes Zibila eta Informatika) eta Tracasa enpresa publikoaren arteko urteetako elkarlanak ondorioztatu du, arazo honi aurre egiteko modurik onena, etxebizitza bakoitzarentzat Helpbidea izeneko identifikatzailea erabiltzea dela, hau da, Nafarroan dagoen edozein eraikuntzari nolabaiteko Nortasun Agiri zenbaki bat egokitzea. Helpbidea identifikatzailea ez da denboran zehar aldatuko, eta larrialdi zerbitzuek ezagutzen dute.
Hau dena ongi azaltzeko eginen dute asteleheneko bilera Beralandetan (18:00). Berako Udalak baserritar guztiak gonbidatu ditu: «Garrantzitsua da zu hemen egotea, larrialdi momentuetan zure baserriraino ahal bezain laster iristea baita helburua».