Amaia Lasheras (Barañain), Ane Telletxea (Lesaka), Beñat Astiz (Barañain), Bittori Elizalde (Iruñea), Ekain Alegre (Altsasu), Ekhiñe Zapiain (Bera), Enma Murillo (Barañain), Etxahun Azkarraga (Etxalar), Idurre Villanueva (Barañain), Iratxe Muxika (Lesaka), Lide Arrieta (Iruñea), Olatz Bados (Altsasu), Uxue Mesa (Lesaka), Xabat Illarregi (Leitza) eta Zuhara Zaratiegi (Barañain) dira Nafarroako eskolarteko txapelketako 33. edizioan kantatuko duten hamabost bertsolariak.
Josu Sanjurjok aurkeztuko du saioa eta Saioa Mitxelena, Julen Zelaieta eta Amaia Telletxea izango dira saioko epaileak.
Parte-hartzaile guztiek honako lana egin behar dute:
- Gai orokor bati kopla edo bertso bana (gehienez 5 puntukoa)
- 4 oinak emanda bertso bana
- Hitza gaitzat hartuta kopla edo bertso bana (gehienez 5 puntukoa)
Hortik sei bertsolari sailkatuko dira bigarren fasera:
- Binaka, gaia emanda, bina bertso zortziko txikian
- Binaka, gaia emanda, hiruna kopla
Azkenik, bi bertsolari pasako dira buruz burukora (kartzela):
- Puntu-erantzun bat
- Gaiari bertso bat
Lan guztiak eginda puntu gehien biltzen dituen bertsolariak jantziko du aurtengo txapela. Txapelketako lehenengo bi sailkatuak, gainera, ekainaren 8an Saran jokatuko den Euskal Herriko Eskolartekorako sailkatuko dira, Nafarroako ordezkari gisa.
Saioa 18:30ean hasiko da Arantzako eskolako soinketa gelan. Sarrera doakoa da, eta saioa amaituta merendua izanen da. Horren ostean, gainera, parte hartzaileentzako egonaldia izanen da Arantzako aterpetxean.