Lesakako Linddurrenborda sagardotegian, 23-25.000 litro inguru egin dituztela aipatu digu Juan Mari Lopez nagusiak, «joan den urtean baino guttixeago». Normalean etxeko sagarrarekin moldatzen bada ere, aurtengoa sagar urtea izan ez denez, «etxekoak, Arantzatik eta Oiartzundik ekarritakoak eta Donibane Garazitik ekarritakoak ere erabili ditugu». Egurrezko kupelen bat baldin badute ere, Linddurrenbordako gehienak altzairu erdoilezinekoak dira: “Garbitzerako orduan erosoagoak dira. Poliesterrekoak ere gero eta zabalduagoak daude, bi geruza dituztenez kondentsazio guttiago egiten zaie, baina horietatik ere bakarra daukagu gurean», aipatu digu Linddurrenbordako nagusiak.
Lesakako Linddurrenbordak, Lekarozko Larraldeak, Berueteko Behetxoneak, Aldazko Martitxoneak eta Lekunberriko Toki-Alai sagardotegiek osatzen dute Dolarea, Nafarroako Sagardotegien Elkartea eta aurten 250.000 litro inguru kupeleratu dituzte.