Eguna hasteko, goizez txarangari izena ematen dion Elutxara mendi irteera egin zuten 30 bat lagunek. Txarangak eskainitako hamaiketakoa eta musika izan zuten bertan, tartean Amaia Telletxeak konposatutako Elutxa kanta.
Arratsaldez, berriz, Kasinoan bildu ziren hainbat lagun, beraien jantzi dotoreneekin, afarirako “etiketaz” janztea eskatu baitzuen Elutxa txarangak. Herrian barna poteoa egin ondotik, koktela photocall-ekin eta zuzeneko musika izan zuten Kasinoan. Musika jotzen talde berezi bat izan zen eta lehenbiziko pieza, Javier Igoak Kasinoko Josefina Sagardiari konposatutako Josefina bonita izan zen, musika laguntzeko egin duen lana eskertuz. Lore-xorta, esker-eskutitza eta kanta horren gidoia jaso zituen Josefinak. Ondotik, ehun bat lagun bildu ziren afarian. Afalondoan, Javier Igoa eta Xalbador Madariaga musikariek kontzertua eskaini zuten.
Urte osoko ospakizunak
Erran bezala, borzgarren urteurrena ederki ospatu du Elutxa txarangak 2018an. Eskailerako afariekin hasi ziren, saskia zozketatu zuten, akordeoilarien kontrako furbol desafioa jokatu zuten, sagardotegian bazkaldu, Beti Gazteko lerro-dantzen taldearekin batera musika eta dantza ikuskizuna eskaini zuten, erraldoien topaketa ere egin zuten irailean eta bukatzeko, gala-afaria. Elutxa txarangako kideak gustora gelditu dira urteak emandakoarekin, aitzinera segitzeko gogoekin daude eta bere ibilbidean izan duten babes guztia eskertu nahi izan dute.