Berako argazkilariaren proposamen honetan, baserriaren atzealdeak bakarrik ageri dira, kasu gehienetan mendebaldeko horma izaten den hori. Jakina da baserri tradizionalak eguzkia sortzen den aldera izaten duela bere fatxada nagusia, ekialdera. Baserriaren atzealdea, ordea, mendebaldera begira izan ohi dute gehienetan, eguraldi zakarra eta haizea datozen tokira. Horregatik izaten dira mendebaldeko paretak apenas leiho eta aterik gabekoak. Argazkietan ageri denak ez du bat eginen, seguru aski, burutan dugun euskal baserriaren irudiarekin. Errealitateak eta pertzepzioak talka egiten duten haustura-tarte horretan kokatu nahi izan du argazki lan hau. Asier Gogortzaren ‘Mendebalde’ erakusketa, beraz, abenduaren 1etik 16ra, zikloan eskainiko diren bi antzezlanen artean ikusteko aukera izanen da. Harriondoa Kultur Etxeko sarreran paratuko dituzte argazkietako batzuk eta, beraz, Kultur Etxea irekia dagoenean ikusteko aukera izanen da. Baina horretaz gain, herriko zenbait etxetako paretetan ere jarriko dituzte.
Bi antzezlan
Larunbatean bertan 20:00etan, Ximun eta Manex Fuchs anaiek osatzen duten Axut! Taldeak Zazpi senideko antzezlana eskainiko du, Ander Lipusen zuzendaritzapean. Bi aktore, bi anaia eta anaitasun ebatsiaren inguruko zazpi istorio antzerkira ekartzen ditu antzezlanak, tartean Gaizka Sarasola herritarrarena.
Anaitasunarena, txikitatik eraikitako labirintoa da, ihesbiderik gabekoa, lotura definitibo bat. Odolekoak ala biziak eskainitakoak, senideak norbanakoa osatzen du. Baina nola aritu anaia, ahizpa, neba edo arreba ebatsia izan zaigunean? Presondegiak, auto istripuak edo gaixotasunak bete ezinezko hutsunea sentiarazten duenean, nola dirau gurea dugun GU horrek bizirik?
Bukatzeko, Miren Tirapu zuzendari eta antzezle duen Beheko Larraineren proposamen berria, Manifestu bat antzezlana taularatuko dute abenduaren 16an, 18:00etan Kasinon.