Zehazki 1988ko urriaren 8an eskaini zuten lehen kontzertua, Lesakan antolatu zen lehenbiziko Nafarroa Oinezaren bezperan. Beti Gazte elkartearen orduko lokalean izan zen, gaur egun Tantirumairu ikastolak gimnasioa duen lekuan. Kanka taldearekin batera, Idrisko Aulkiak (orduko Lesakako bertze talde bat) eta euskal musikagintzan erreferente izan den M-ak taldeak jo zuten.
Kankaren lehen emanaldi hartan, gainerako guztietan bezala, Jabier Fagoaga aritu zen kantari; Nobeto Mitxelenak jo zuen baxua, Martin Mazi Mazizior eta Jabier Mari Zerunta Mitxelenak gitarrak eta Tomas Otxotekok bateria. Geroztik zenbait taldekide berri ere izan dituzte, hala nola Julio Antzizar (ahotsa), Karlos Semper (bateria) edo Jon Koldo Arburua (gitarra).
Beraz, ‘Kanka’, ‘Hautsa, birras, rock&roll’, 'Guk euskaraz' edo ‘Polimat’ bezalako doinuak berriz ere aditzeko aukera izanen dute taldearen zaleek eta ezagutzen ez dutenek larunbat arratsean.
