Ikastetxeko Balio Etikoen mintegiko ikasle eta irakasle batzuek astearte goizean egin dute azoka, 'Bertakoa jan, bertakoa jantzi, urrun eragin' goiburupean
Gisa honetara, tokian tokikoa eta garaian garaikoa jatearen onura mahai gainean jarri nahi dute. Gaineratu dutenez, «erabiltzen ez dugun arropa bertze pertsonekin trukatzeak guregan sor dezakeen gozamenak kontsumismoa murrizteko bidean, argi bat pizteko desioa adierazi nahi genuke».
Berako institututik azaldu dutenez, «inguruko ekoizle agrokologikoengandik lortutako elikagaiek, ingurumena, lurra, ura eta osasuna zaintzen dituzte eta horrez gain, bidezkoak diren lan harremanak bermatzen dituzte». Azoka antolatuta, «munduko komunitate guztiek elikagai osasuntsuak ekoizteko eta jateko aukera defendatzen duen Elikadura Subirautzarako urrats ttiki bat» eman nahi izan dute.