erran.eus

Garazi Conderen kartelak iragarriko ditu aurten ere Lesakako Sanferminak

  Gizartea  Bortziriak  Lesaka

Programaren portadako irudia ere Garazi Condek egindakoa da eta programaren gibeleko azala Onintze Iparragirrerena 

Lesakako Sanferminak iragarriko dituen kartela eta besten programako azala eta kontrazalean joanen diren irudiak aukeratu dituzte. Karteletan, iaz bezala Garazi Conde Oruberen lan bat saritu dute, Plazan goiburua daramana. Lau lan aurkeztu dira lehiaketara. Programaren azalerako lehiaketara ere lau lan aurkeztu dituzte eta hemen ere Garazi Conderen bertze lan bat aukeratu dute, Fandango II izenekoa.

Garazi Conderen kartelak iragarriko ditu aurten ere Lesakako Sanferminak
Garazi Conderen 'Plazan' izan da kartel lehiaketako irabazlea. | Ikusi handiago | Argazki originala

 

Bakoitzarengatik, 250na euroko bonoa eskuratuko du saritzat, herriko komertzio, zerbitzu edo ostatuetan erabiltzeko.

Herrian Lehen Hezkuntza ikasten duten ikasleei zuzendutako programaren kontrazal lehiaketara 130 lan aurkeztu dituzte eta horien artean, Onintze Iparragirre Irigoienen Zezen artista aukeratu dute irabazle. Honek, 100 euroko bonoa izanen du saritzat, herriko dendetan eskolako materiala erosten erabiltzeko, bere lana programaren gibeleko azalean argitaratua ikusteaz gain.

Aste Santu inguruan Turismo Bulegoan egindako erakusketan herritarrek emandako bozkekin aukeratu dira aurten ere Sanferminetako irudi irabazleak. Erabaki honekin, eta bi hilabete eskas falta direla, besta usaina somatzen hasia da herrian. Besta Batzordeak ere lehen bilerak egin ditu eta hasia da uztailaren 6tik 10era egitarauaren xehetasunak lotzen.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa