Laugarren bat bere kabuz atera da ibai bazterrera, Zalain inguruan
Bidasoa ibaian zebilen ontzia irauli eta barnean zeuden lau gazte uretara erori ziren apirilaren 17an, astearte arratsean, Zalain auzoan. Nafarroako Larrialdi zerbitzuek asteartean 20:39an jaso zuten deia. Ontzia irauli eta lau gazte erori ziren Bidasoa ibaira. Horietako bat bere kabuz atera zen eta Lesakako Osasun Zentrora eraman zuten. Bertze hiruak, ordea, harri batera igo ziren eta, uraren indarragatik, erreskatearen zain gelditu ziren.
Lesakako suhiltzaile boluntarioak eta Oronozko parkekoak hurbildu ziren Zalainera, baita Iruñeko bertze bi suhiltzaile ere. Hiru gazteei arnesak jarri, sokara lotu eta ibai bazterrera atera ahal izan dituzte.
Erreskate lanak ez dira batere errazak izan, ibaia indartsu baidator. Arratseko hamekak aldera atera ahal izan dituzte hiru gazteak eta Osasun Zentrora eraman dituzte, hipotermia sintomekin.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.